Something about me

由PS3出果一刻話會出，等左3年幾先出到o既大作Final Fantasy 13，
廠方話係破傳統既RPG，到今日終於玩到第11章 (全game 13章)。

暫總結一下破傳統既地方:
1. RPG game 冇宿屋，冇城市既概念。
2. 打完一次戰鬥之後自己會補返哂HP/MP。
3. 冇防具，而家通常會有既轉防具連轉主角套衫都唔會有，取代防具
既係accessory。
4. 基本上唔需要同任何人對話，唔需要問npc (non-player control) 就
可以知條路點行，因為地圖只得一條路線。
5. 流程基本係 睇片 > 行地圖 > 打怪 > 睇片 >行地圖 > ...... 當中一d
解謎要素都冇，連寶箱都係浮o係半空，見到果陣鍾意拎就拎。
6. 去到第10章遊戲系統都有野再開放 (都差唔多打完..)。
7. 音樂好悶，黎黎去去都係果一兩首歌，冇左FF系列既音樂大師植松
伸夫o既曲真係爭左d野咁。

網上個個話到第11章先係真正開始，我就覺得唔係講得咁差o既，假如
完全唔睇劇情就係咁打既人可能會咁諗啦。

BTW, 第2次買行貨價既game，再一次中招，買完之後唔夠一星期，隻
game由定價$649跌到$500幾.. 今日上網睇跌到$ 430......

不經不覺做左5個幾月元朗人，其實都唔係咁慣。因為感覺上
好似同屋企人朋友分得好開咁... (我知，有時係我自己掛住打
機睇電視上網掛住hea 寧願唔出街，唔關任何人事)

附近起緊新一期，我都唔知幾想佢快d 搞掂，起碼我都有d 推
動力去行下街，唔駛出去元朗市度行。果度d街又窄，d人又
鍾意行o係你前面食煙 (雖然香港度度都係咁)，人又超多，又
冇咩好行，d人既素質又....... 除左搭車方便之外，(搭車係方便，
不過時間都唔短.. 快過屯門既又) 同食野多少少選擇之外，(雖然
我大部份時間都係食外賣).. 其實都冇咩特別。

唔知新一期推出黎賣之前.. 我地會唔會已經俾人迫遷左呢?

同期一大班人入機構做野，大家都唔知大家入面做乜，不過
講真我呢個位真係好悶...... 機構希望同事唔好返工上網，根本
冇可能啦，返工冇野做又冇得上網，真係會悶得死人......

唔係曬命，不過冇野做扮有野做既時間係比做到死死下更漫長
又難過，老細行出行入，真係冇野做都要搵個file 出黎扮做緊野，
而老細其實明知你係冇咩野做既......

我就唔想因為咁份appraisal 寫得唔好喇...

過去的2009年可以講得上人生最大起大落既一年，由2008.12.31收
工接通知收到大信封，到決定唔轉上大陸而去另一間公司...... 由1月
放假到2月中，返左兩個月就再停兩個月，3-4月可算人生最辛苦既
一段時間，只有 不知所謂 去形容。

搵左個幾月工，差dd就要去做清潔既時候 (到而家我都唔知點解會
in果份工.. 仲要請我)，好彩搵到一份自己幾鍾意既工。呢度同事唔
多不過好多人事既問題，我曾經覺得自己黎左做之後可以有dd影響
力去扭轉問題，亦好開心搵到一個好欣賞我既上司，坦白講佢令我
個人有返多d自信，原來我唔係一事無成得咁緊要，仲成日o係老闆
開會時讚我，等我一個月就過左試用仲加埋人工。 呢段期間我返工
除左對腳累，其實真係幾開心，得閒又可以同阿哥去食lunch同dinner
咁。

正正就o係上司同我講提出加人工既前果日，我收到新工既信，叫我
去interview (apply左份工成半年，連我自己都唔記得左..) 又結果俾
我覺得in得幾好，不過自問冇咁好彩，又冇理到安安份份返工，繼續
日日去hmv聽歌既日子。不過今次竟然俾我成功左。事實上我其實唔
知份工做乜，只係覺得機構好穩陣，以工作黎講人工高於出面，又唔
會點炒人，返工時間又準，冇理由同錢作對之下，雖然有掙扎有唔捨
得都quit左做緊果份去轉工。

當然，呢一年最緊要既就係搞我既人生大事 - 結婚。
由08年2月book 影pre-wedding， 到11月去影相，期間book 呢樣果
樣 (事實最忙既係老婆，我只係負責俾下意見.... ) 到7月中搵屋搬屋，
8月入伙，時間真係過得好快又好慢咁...... 不經不覺就到派帖，final
fitting.. 安排呢樣果樣。

結婚當日發生過既事好深刻，但係又好似發左場夢咁。

轉眼間就12月，終於第一次兩個人有屋仔有狗仔有佈置既情況下過
左一個舒舒服服唔駛同人迫既x'mas。

從未試過像今天這麼忙過，真的忙得連洗手間都沒時
間去，水也沒喝過，聽說暑假會更忙，還是未能想像
得到。

下班後到了家中電話，說收到了一封政府信，一方面
自己估計應該沒這麼快有結果，但另一方面已經想到
假如真的成功了應該怎辦，跟店長如何交代? 暑假將
至，如果我離開了他們夠不夠人手呢? 店長又如何跟
上級交代? 結果開信後，原來只是月初做的那個基本
法的result notification，害我白緊張了一整晚。

晚上跟朋友們吃飯，整晚不停地說話，可能這份工平
日要一本正經，同事間盡量減少不必要的交談，所以
下班後就跟解脫了一樣。