Something about me

假如打機有攻略, 我想知有冇一本書教同屋企人相處。

但o係有呢本書之前, 我仲好想有一本<如何做人>,
近半年情緒波動比之前更大, 感覺自己好似一個憤青,
樣樣事都不如自己意思, 問題係唔關自己事既野都會
睇唔過眼, 會埋怨會發火, 達到痴線既地步。

通常發完火轉頭冇事, 冇事之後又問自己: 為乜要咁躁?

有樣野都幾大鑊, 今晚沖沖下涼, 發現原來自小六過後(差唔多20年)
都冇正正式式同屋企人坐底好好傾過一樣野, 人越大越覺得
屋企人睇野同我太唔同, 而通常講講下實有人越講越大聲
發火 (呢個人唔一定係我), 所以每一件事都唔會有結論,
而且通常都不歡而散。

都曾經有改善, 就係當阿媽返夜, 好日唔見既時候, 會多
左返屋企同阿爸食飯, 會刻意搵話題; 但當阿媽轉返朝九
晚五, 情況又急轉直下, 問題唔係出o係阿媽度, 係當三個人
o係一齊既時候, 往往傾傾下就有人講錯野, 或者有人又發火,
久而久之, 屋企三個人唔會講野, 冇咩好講, 我又唔想聽到佢地
講野, 每一日只係返屋企對住電腦, 返上床打機, 宅男一個。

屋企人越黎越唔想講野我聽, 但有d野係收唔埋既 (需知我屋企得
300呎多d, 有咩私隱可言?) 次次最後都係俾我知, 我真係好失望,
唔同我講唔係對我好, 亦解決唔到問題, 我已經講左百九幾次.....
但結果都一樣。

我唔係要所有野都就哂我, 唔該唔好驚我怕我, 我把口同份人係衰,
但我都想大家好, 或者我未學點講野圓滑d, 未學變臉, 但都唔好逃避
問題既存在, 唔出聲唔係代表冇事, 亦唔係代表解決到......

悲哀既係, 我可見既將來, 所有以上既煩惱都會成世困擾住我。